Me 22 dhjetor të vitit 2010, ish-veterani i UÇK-së dhe pastaj pjesëtar i Policisë së Kosovës, Arben Sejdiu nga Grabnica e Klinës, u vra në shtëpinë e tij nga persona ende të paidentifikuar.
Ai, derisa po qëndronte në shtëpi, ishte sulmuar me armë zjarri, ku kishin mbetur të plagosur edhe dy familjarë të tij.
Derisa po shkonte në shtëpi pas përfundimit të orarit të punës, u vra edhe një ish-ushtar i UÇK-së dhe pjesëtar i Policisë në Kaçanik një ditë më parë, Muhamed Lika.
Lidhur me vrasjen, pas një dite pati reagime të shumta.
Sindikata e Policisë së Kosovës e konsideroi atentat kriminal vrasjen e tij.
“Ky akt i rëndë është një atentat i drejtpërdrejtë ndaj sigurisë publike, ligjit dhe vetë shtetit të Kosovës. Çdo sulm ndaj një zyrtari policor është sulm ndaj Republikës së Kosovës!”, thuhet nga sindikata.
Për këtë rast reagoi edhe ministri i Punëve të Brendshme, i cili bëri thirrje për dorëzim të personit ose personave të përfshirë.
“Ftoj dorasin apo dorasit që sa më parë të dorëzohen në organet e rendit, meqë i gjithë aparati shtetëror pa hezitim dhe pa kursim është i mobilizuar të zbulojë dhe arrestojë të gjithë ata që janë përfshirë në këtë vrasje”, ka theksuar Xhelal Sveçla, Ministër i Punëve të Brendshme.
Ndërkaq, reagime të menjëhershme të organeve të rendit kërkoi edhe kryetari i Kuvendit të Kosovës, Glauk Konjufca.
“Bëj thirrje për hetime sa më të plota e të shpejta që është e mundur, në mënyrë që autori apo autorët e këtij krimi të vendosen përballë drejtësisë. Ngushëllimet më të sinqerta për familjen, miqtë dhe kolegët e rreshterit Muharrem Lika, të cilët duhet të gjejnë forcën për ta përballuar këtë humbje të madhe!”, ka deklaruar Konjufca.
Reagim nga institucionet dhe ngushëllime shprehen edhe nënkryetarja e PDK-së, Vlora Çitaku, kryetari i AAK-së, Ramush Haradinaj, dhe kryetari i AAK-së, Behxhet Pacolli.
Këtë rast, eksperti i sigurisë Avni Islami po e konsideron alarm për sigurinë.
“Që të vijë deri te parandalimi i rasteve të tilla, duhet që ne si shoqëri, duke filluar nga familja, shkollat, dhe organizatat joqeveritare, të dalim me strategji lidhur me armëmbajtjen pa leje, sepse armët nuk duhet të mbahen nga persona të papërgjegjshëm”, ka theksuar Avni Islami, Ekspert i sigurisë.
Në 10 ditët e fundit, në Kosovë janë vrarë 5 persona në rrethana të ndryshme.
