Në mungesë të të akuzuarit Blerim Avdiu, ka dështuar të mbahet seanca fillestare të hënën në Gjykatën Themelore në Prishtinë, në rastin ku i njëjti akuzohet se përmes rrjetit social Facebook ka kanosur ministrin në detyrë të Bujqësisë, Faton Peci, njëherësh deputet i Grupit Parlamentar të Lëvizjes Vetëvendosje (LVV). Ndaj Avdiut, Gjykata do të lëshojë urdhëresë për sjellje me detyrim.
Gjykatësja e rastit, Valbonë Fejza, tha se i akuzuari ka qenë i njoftuar në mënyrë të rregullt përmes procesverbalit të 11 prillit 2025, raporton “Betimi për Drejtësi”.
“Mungesën nuk e ka arsyetuar dhe njëkohësisht nuk kërkuar as shtyrje për ndonjë rrethanë të paparashikuar… ndërsa për të pandehurin Gjykata do të lëshojë urdhëresë për sjellje me detyrim”, tha gjykatësja Fejza.
Ndryshe, prezent në seancë ishin prokurori i shtetit- Paulin Pashku, i dëmtuari Faton Peci, si dhe mbrojtësi i Avdiut, avokati Hamdi Podvorica.Prokuroria Themelore në Prishtinë më 26 mars 2025 ka ngritur aktakuzë ndaj Blerim Avdiut, të cilin e ngarkon se më 2 mars 2025 me rastin e postimit të një fotografie në rrjetin social “Facebook” nga i dëmtuari Faton Peci- si ministër i Bujqësisë, Pylltarisë dhe Zhvillimit Rural lidhur me aktivitetet e tij si ministër, Avdiu nga profili i tij në “Facebook” me dashje ka kanosur seriozisht të dëmtuarin, duke i dërguar mesazhe fyese dhe kanosëse.
“Si kryeminel ti q… edhe ata të vdekurit une kam me të vra jo tjetër kush, kryeminel ti gjall e un gjall nuk kemi me jetu jo pot tham qat ditë se te mrri në ks asnjani nuk kena me kan ket jet o bir shkine o bir shkavi ta dish edhe vorrin e nanes, kryeminel mos harro me 28 maj jam në kufi veq me ardh me të vra ty kena me ardh dije mirë”, citohen në aktakuzë fjalët kërcunese të të akuzuarit drejtuar të dëmtuarit Peci.
Me çka, sipas Prokurorisë, i akuzuari Avdiu me këto fjalë ka shkaktuar te i dëmtuari Peci ndjenjën e frikës dhe ankthit për jetë.
Andaj, për këto veprime, Avdiu ngarkohet se ka kryer veprën penale “Kanosje” nga neni 181, paragrafi 3 lidhur me paragrafin 2 të Kodit Penal.
