Tubimi treditor ‘Serbinë nuk do ta japim’ nis me largime masive të qytetarëve para fjalimit të Vuçiqit

Para Kuvendit të Serbisë është mbajtur tubimi politik treditor me moton “Serbinë nuk do ta japim”, i organizuar nga presidenti i Serbisë, Aleksandar Vuçiq.

Fjalimi i paralajmëruar i presidentit ishte caktuar për orën 19:00, por jo të gjithë patën interesim të dëgjojnë se çfarë ka për të thënë presidenti serb.

Në rrjetet sociale janë publikuar video ku shihen kolona qytetarësh që kthehen nëpër urën e Brankos te autobusët e parkuar në afërsi, duke lënë vendin e tubimit para se të niste fjala kryesore e Vuçiqit.

Sipas nova.rs, kjo nuk është hera e parë që qytetarët të cilët janë detyruar dhe shantazhuar të vijnë në mbledhjet e progresistëve largohen para fillimit të takimit. Një tubim i ngjashëm është zhvilluar edhe një ditë më parë.

Presidenti serb më 8 prill bëri thirrje për pjesëmarrje në këtë tubim treditor, i cili do të zgjasë nga 11 deri më 13 prill, duke e promovuar si një nismë në emër të lëvizjes së re politike që ka themeluar, “Lëvizja për Popullin dhe Shtetin”.