I dërguari i Donald Trumpit, Steve Witkoff, ka thënë të dielën se presidenti amerikan pritet të flasë me presidentin rus, Vladimir Putin këtë javë, duke thënë se presidenti rus “pranon filozofinë” e armëpushimit dhe kushteve të paqes të Trumpit.
Witkoff i ka thënë CNN-it se diskutimet me Putinin javën e kaluar ishin “pozitive” dhe “të bazuara në zgjidhje”.
Ai nuk ka pranuar të konfirmonte kur u pyet nëse kërkesat e Putinit përfshinin dorëzimin e forcave ukrainase në Kursk, njohjen ndërkombëtare të territorit ukrainas të sekuestruar nga Rusia si rus, kufizimet në aftësinë e Ukrainës për t’u mobilizuar, ndalimin e ndihmës ushtarake perëndimore dhe ndalimin e paqeruajtësve të huaj.
Putini ka thënë të enjten se ai mbështet një armëpushim, por ka përshkruar detaje të shumta që duhet të negociohen përpara se marrëveshja të mund të përfundojë.
Presidenti rus ka thënë se ishte i hapur për një armëpushim 30-ditor të propozuar nga SHBA-ja, por ka paraqitur kushte të paqarta për mbështetjen e tij, duke ngritur pikëpyetje se çfarë dëshiron Kremlini.
