Dy persona kanë mbetur të lënduar pasi vetura e tyre u godit nga treni mëngjesin e së dielës në Prishtinë. Banorët e asaj zone po kërkojnë nga institucionet të ndërmarrin masa parandaluese, për shkak se thonë se në vendin e njëjtë janë regjistruar disa aksidente të ngjashme.
Pjesë të veturës janë shenjat e vetme të aksidentit që ndodhi mëngjesin e së dielës.
Rreth orës 7:30 treni godi një veturë e cila po kalonte në rrugën Ramiz Cërnica në Prishtinë.
E nga ky aksident dy persona janë lënduar.
Në vendin e ngjarjes kanë dalë edhe ekipet e Policisë.
“Më datë 27.04.2025, rreth orës 07:30, në rrugën “Ramiz Cërnica” në Prishtinë, ka ndodhur një aksident trafiku mes një veture dhe një treni. Si pasojë e aksidentit, lëndime trupore kanë pësuar dy persona. Në vendin e ngjarjes kanë dalë njësia e hetimeve të trafikut rrugor dhe përgjegjësit për aksidente hekurudhore, të cilët kanë kryer ekzaminimet dhe shikimin e vendit të ngjarjes”, thuhet nga Policia e Kosovës.
E personat që ishin dëshmitarë të këtij aksidenti dhanë detaje shtesë.
“Personat që kanë qenë në veturë kanë qenë shumë në rrezik do të thotë e ka shty rreth 20 metrave treni veturën prej vendit të ngjarjes edhe pas një 10 minutave kanë ardhur Policia dhe ndihma e shpejtë”, tha qytetari Veton Muhaxheri.
Por kjo nuk është hera e parë që ndodhin aksidente të këtij lloj në këtë vend.
Prandaj banorët e kësaj pjese kërkojnë nga institucionet që të ndërmarrin masa parandaluese.
“Kjo rrugë është shumë e qarkullueshme ditët e fundit patjetër duhet që institucionet përgjegjese me bë diçka që me vendos laurat edhe sidomos të dieleve në këtë kohë është tregu i automjeteve edhe shumë prej atyre që vijnë nga qytetet tjera nuk e dijnë që treni kalon edhe te dieleve”, tha Arian Havolli.
Të dielën e kaluar, katër persona mbetën të lënduar në Klinë pasi vetura e tyre u godit nga treni.
