Qëllimet kryesore të presidentit rus Vladimir Putin në çdo bisedim paqeje përfshijnë bllokimin e anëtarësimit të Ukrainës në NATO dhe zvogëlimin e pranisë ushtarake të aleatëve në krahun lindor, raporton Financial Times, duke cituar një ish-zyrtar të Kremlinit për këtë çështje.
Lajmi vjen pasi Kremlini sinjalizoi gatishmërinë e tij që Putini të takohej me presidentin e zgjedhur të SHBA-së, Donald Trump, për të arritur një marrëveshje për t’i dhënë fund luftës së Rusisë kundër Ukrainës. Nuk janë caktuar plane apo datë specifike, megjithëse Moska ka treguar se çdo takim do të zhvillohet vetëm pas inaugurimit të Trump më 20 janar.
Trump ka premtuar se do të sjellë Kievin dhe Moskën në tryezën e bisedimeve dhe do t’i japë fund shpejt luftës gati trevjeçare. Në fillim të kësaj jave, ai u tha gazetarëve se diskutimet për një takim me Putinin ishin në vazhdim.
Presidenti i zgjedhur i SHBA tha më parë se propozime specifike për paqen ishin ende duke u përpunuar.
Një propozim i zbuluar nga ekipi i Trump është vonimi i anëtarësimit të Ukrainës në NATO me 20 vjet dhe vendosja e paqeruajtësve evropianë në terren që tashmë është refuzuar nga Rusia.
I dërguari i ardhshëm i Trump për Ukrainën, Keith Kellogg, tha se qëllimi i presidentit të zgjedhur nuk është t’i “dhurojë diçka Putinit apo rusëve”, por “të shpëtojë Ukrainën dhe sovranitetin e saj”. Megjithatë, Trump shpesh ka shprehur simpatinë për liderin rus, duke shkaktuar frikën se ai mund të arrijë një marrëveshje që nuk komprometon Ukrainën.
Dy qëllimet kryesore të deklaruara të Putinit pasqyrojnë kërkesat që Moska bëri pak para fillimit të pushtimit. Administrata e Bidenit dhe aleatët e NATO-s më pas i hodhën poshtë këto kërkesa.
Ukraina, nga ana e saj, ka shtuar përpjekjet e saj për t’u bashkuar me aleancën që nga shpërthimi i luftës, duke kërkuar garancinë më të mirë të mundshme që Rusia nuk do të përsërisë agresionin e saj në të ardhmen.
Presidenti ukrainas Volodymyr Zelensky ka sugjeruar që Ukraina mund të hyjë në NATO gradualisht, me parimin e mbrojtjes kolektive që fillimisht nuk u shtri në territoret e pushtuara nga Rusia.
Shtytja për bisedimet e paqes vjen ndërsa Kievi dhe Moska përballen me sfida në rritje për shkak të luftës.
Forcat ukrainase po përpiqen të frenojnë përparimin e Rusisë në lindje për shkak të mungesës së fuqisë punëtore, ndërsa e ardhmja e mbështetjes perëndimore është gjithnjë e më e pasigurt nën Trump.
Shanset për të rimarrë territorin e kontrolluar nga Rusia për Ukrianën duken gjithnjë e më të pakta.Rusia, nga ana e saj, sipas ‘Kyiv Independet’, po përballet me inflacion në rritje për shkak të shpenzimeve rekord ushtarake dhe viktimat e saj besohet të jenë midis 600,000-800,000 të vdekur dhe të plagosur, duke tejkaluar të gjitha konfliktet e Moskës që nga Lufta e Dytë Botërore së bashku.
