Shefi i Grupit Parlamentar të Partisë Demokratike të Kosovë (PDK), Abelard Tahiri, ka thënë se teksa kryeministri Albin Kurti, alarmon për rrezikun nga ushtria serbe, komandant i FKS-së paralajmëron problemet e shërbimit të ushqimit.
Tahiri këtë gjendje e ka quajtur si shqetësuese dhe të papranueshme.
“Derisa kryeministri Kurti alarmon për rrezikun që vjen nga ushtria serbe dhe provokimet e tyre në distancën prej 50 metra nga vija kufitare e shtetit tonë, nga ana tjetër, komandanti i FSK-së paralajmëroi se problemet e shërbimit të ushqimit si dhe mungesa e personelit mund të qojnë në pezullimin e aktiviteteve të saj”.
“Kjo gjendje është jo vetëm shqetësuese por e papranueshme. Ushtria e Kosovës është krenaria e secilit qytetar dhe nuk duhet të neglizhohet e as të vihet në situata të tilla për shkak të paaftësisë së një qeverie”, ka shkruar Tahiri në Facebook, të dielën.
Ai ka thënë se Qeveria e ardhshme, sipas tij e udhëhequr nga Bedri Hamza do t’i restauroj këto dëme.
“Megjithatë, tashmë vetëm javët na ndajnë nga zgjedhjet e 9 shkurtit përmes të cilave qeveria e ardhshme e udhëhequr nga Bedri Hamza do të restauroj dëmet dhe pasojat e mëdha”, ka thënë Tahiri.
