Sekretarja e Shtypit në Shtëpinë e Bardhë, Karoline Leavitt, iu përgjigj, pyetjes mbi statusin e marrëveshjes së mineraleve të propozuar nga presidenti Donald Trump për Ukrainën.
Sipas mediave të huaja, Leavitt thotë se nuk ka pasur “përditësime të rëndësishme” mbi marrëveshjen që kur Trump foli për mediat dje, por ajo përsërit qëndrimin e Presidentit.
“Është e rëndësishme që kjo marrëveshje të nënshkruhet, ai pret që Volodymyr Zelenskyy ta nënshkruajë marrëveshjen”, thotë ajo.
“Kjo është për të rikuperuar dollarët e taksave amerikane që kanë financuar mbrojtjen kombëtare të Ukrainës dhe është gjithashtu ‘e mrekullueshme’ për popullin ukrainas që është futur në ferr për shkak të kësaj lufte”, tha ajo më tej.
“Do të krijojë një partneritet ekonomik të qëndrueshëm pasi Ukrainës do t’i duhet të rindërtojë vendin e saj për shkak të kësaj lufte brutale”, vijoi Leavitt më tej.
Kujtojmë se Ukraina është përballur me presion nga administrata Trump për të nënshkruar një marrëveshje për aksesin në mineralet e saj të rralla.
Trump ka thënë se ndihma ushtarake dhe ekonomike e SHBA-së në Ukrainë ka arritur në rreth 500 miliardë dollarë dhe në këmbim, ai dëshiron që SHBA të ketë akses në mineralet e Ukrainës me këtë vlerë.
Një burim ukrainas i tha Sky News se Zelenskyy “nuk është gati” të nënshkruajë marrëveshjen e SHBA-së për shkak të një “numri çështjesh problematike”, me një draft që pretendonte se SHBA kishte kërkuar një pjesë prej 50% të mineraleve të rralla të Ukrainës.
