Dy shtetas të Shqipërisë, pjesëtarë të shoqërisë civile që po merrnin pjesë në një seminar në Beograd, janë ndaluar dhe larguar nga territori i Serbisë.
Ndaj këtij veprimi, ka reaguar Ministria për Evropën dhe Punët e Jashtme (MEPJ) e Shqipërisë, e cila sot ka thirrur në ambientet e veta Ambasadorin e Serbisë në Tiranë, Slobodan Vukçeviq.
“Gjatë takimit u transmetua keqardhja dhe shqetësimi serioz për ndalimin dhe largimin nga territori i Serbisë të dy shtetasve shqiptarë, përfaqësues të shoqërisë civile, të cilët kanë marrë pjesë në një seminar në Beograd.
“Ky veprim nuk konsiderohet në përputhje me dëshirën dhe përpjekjet tona për të ruajtur marrëdhënie të mira fqinjësore, si dhe ka impakt negativ në lëvizjen e lirë të shtetasve tanë”, u tha në reagimin e MEPJ-së së Shqipërisë.
Kjo Ministri kërkoi sqarime lidhur me këtë rast dhe theksoi nevojën që autoritetet serbe të rishikojnë dhe të marrin në konsideratë apelimin e vendimeve të marra.
U kërkua gjithashtu që të mos lejohet përsëritja e ngjarjeve të tilla në të ardhmen.
“Ky rast është duke u ndjekur me vëmendje të plotë nga Ambasada Shqiptare në Beograd”, u theksua në reagimin e MEPJ-së shqiptare.
