Nënë e bir mbetën të vdekur mëngjesin e hershëm të 19-shtatorit në Nikoliq të Hasit, pasi banesa e tyre u përfshi nga zjarri.
Tashmë familja Lushi ka hapur dyert për ngushëllime, për 57-vjeçarin Rexh Lushi dhe nënën e tij Fatime Lushi.
Një bashkëfshatar i 57-vjeçarit ka thënë se nuk kishte mundësi ta ndihmonte. Ai ka treguar momentin kur bashkëshortja pasi ka dalë, e ka thirrur Lushin të dalë nga banesa e përfshirë nga flakët, por nuk ka dëgjuar zë.
“Rexha ka jetuar këtu, ndërsa fëmijët i ka në emigrim. Edhe vëllezërit i ka në emigrim në Angli. Vetë jetonte me nusen dhe me të ëmën. Në orën 1 të natës ka dalë jashtë dhe ka lajmëruar policinë. Ka hyrë për të nxjerrë nënën nga shtëpia. Bashkëshortja ka dalë jashtë dhe e ka thirrur: Hajde dil jashtë por nuk ka dalë, ka ngelur brenda”, është shprehur Shkozet Bebexhia, një tjetër bashkëfshatar i viktimave.
Fqinjët kanë rrëfyer momentin kur gjetën trupat e viktimave.
“Rexhën e kemi gjet t’u u kallë akoma në kuzhinë. E kemi nxjerrë jashtë. Ishte i dëmtuar fare, i shkrirë komplet”, ka thënë për Report TV Neritan Koka, një tjetër banor i fshatit.
Banorët e fshatit besojnë se zjarri mund të jetë shkaktuar si pasojë e problemeve me energjinë elektrike.