Prokuroria Themelore në Prishtinë ka ndaluar të dyshuarin për kanosje ndaj drejtuesit të emisionit ‘Debat Plus’, Ermal Panduri.
Nëpërmjet një komunikate për media, Prokuroria njofton se i dyshuari XH.K., ka kanosur Pandurin përmes rrjetit social.
“Prokuroria Themelore në Prishtinë, iu njofton se si rezultat i veprimeve hetimore të ndërmarra nga Prokurori i Shtetit, në bashkëpunim me Policinë e Kosovës, ka ndaluar personin e dyshuar me inicialet Xh.K., i cili ka kanosur gazetarin E.P., gjatë kryerjes së detyrës së tij, përmes rrjetit social. Ky rast është iniciuar më 22 korrik 2024”, thuhet në njoftim.
I dyshuari i lartcekur është dërguar në mbajtje në kohëzgjatje prej 48 orësh, për shkak të veprës penale “Kanosja” dhe ndaj të njëjtit do të ndërmerren veprimet e mëtejme ligjore.
Ndryshe, Panduri ka njoftuar se ka pranuar kërcënime të shumta pas fillimit të transmetimit ciklit të intervistave me rrëfimet e të burgosurve politikë, të cilët kanë bërë publikë emrat e shqiptarëve të cilët në bashkëpunim me UDB-në kanë torturuar barbarisht shqiptarët.
