Mosmarrëveshjet për motive të ndryshme, e që shpeshherë dalin të jenë banale bëhen mollë sherri e kërcënimeve e përleshjeve në vendin tonë. Për pasojë, konfliktet jo rrallëherë eskalojnë dhe ndërhyn Policia.
Kështu ka ndodhur mëngjesin e sotëm në lagjen Karagaç në Pejë, ku intervenoi Policia.
Dy persona u përfshinë në një debat verbal të momentit teksa ndodheshin në rrugën “Mehmet Gradica”, që për pak të eskalonte në përdorim të armës.
Sipas informacioneve të para, fillimisht i dyshuari dhe viktima kanë pasur fjalosje e më pas ky i fundit i ka shkuar palës tjetër në shtëpi, për t’u sqaruar lidhur me atë që kishte ndodhur.
Në ato momente, i dyshuari kishte dalë nga shtëpia me një armë zjarri, të cilën e kishte të mbushur – por që nuk e shkrepi.
Të njëjtat burime thonë se posa Policia është vënë në dijeni, njësitet përkatëse kanë dalë në vendin e ngjarjes
I dyshuari është arrestuar dhe shoqëruar në stacion policor, ndërsa arma ilegale është konfiskuar.
Ndaj tij, Prokurori i Shtetit, ka urdhëruar inicimin e rastit për veprën penale “Armëmbajtje pa leje”.
