Gjysmëfinalja e spektaklit “Big Brother VIP Albania 4” u shoqërua me një përplasje të fortë emocionale mes Laertit dhe Gjestit, pas publikimit të një klipi ku Gjesti, Egli dhe Gerta shiheshin duke vënë në dyshim rrëfimin personal të Laertit për abuzimin seksual që kishte përjetuar në moshën 9-vjeçare.
Diskutimi në studio rreth klipit ndezi menjëherë tensionin mes banorëve, dhe Laerti reagoi me emocion të thellë, duke shpërthyer ndaj Gjestit:
“Ti nuk e di çfarë kam kaluar! Si guxon të thuash që kam gënjyer?”, u dëgjua të thoshte ai me zë të lartë, i prekur dhe i zhgënjyer.
Gjesti, nga ana tjetër, reagoi me një ton të ftohtë, duke i kërkuar Laertit të ulte zërin:
“Mos ma ço zërin”, tha ai, duke i shtuar edhe më shumë tension situatës në studio.
Momenti u kthye në një arenë emocionale ku përballeshin dhembja personale e Laertit dhe komentet e shokëve të shtëpisë, që në atë moment u dukën të pamatura dhe të nxituara.
Laerti nuk e fshehu zhgënjimin që ndjeu nga ata që i kishte konsideruar shokë, duke deklaruar se ishte një nga përjetimet më të vështira që kishte kaluar në shtëpinë e “Big Brother VIP”:
“Historia që kam ndarë ka kërkuar shumë guxim dhe ka qenë një hap i rëndësishëm në rrugën time të shërimit personal”, tha ai.
Pas përplasjes, me ndërhyrjen e moderatorit dhe pas reflektimit në atmosferën e rënduar, Gjesti, Egli dhe Gerta kërkuan falje publike për fjalët e tyre.
Ata pranuan se ishin shprehur në afekt dhe nuk kishin menduar se sa e thellë ishte plagë që mund të kishin hapur me komentet e tyre.
