Pothuajse e kryer. Ka marrë fund gara mes dy kandidatëve të AAK-së dhe NISMA-s për një ulëse në kuvend.
Pas përditësimit të rezultateve preliminare të KQZ-së nga verifikimi i votave, Lahi Brahimaj i AAK-së ka krijuar diferencë të thellë prej mbi 400 votave me Vesel Krasniqin e Nismës Socialdemokrate.
Bazuar në rezultatet e kandidatëve për deputetë të përditësuara të premten në orën 11:42, me afër 95% të votave të numëruara, Lahi Brahimaj i ka fituar 11.308 vota, ndërs Vesel Krasniqi 10.832 vota.
Kësisoj, Nisma e Fatmir Limaj nuk do të arrijë kuotën e katër deputetëve, të cilën do ta fitonte vetëm në rast se kandidati Krasniqi do ta kalonte në vota Brahimajn e AAK-së.
Ende kanë mbetur për t’u numëruar dhe verifikuar edhe 100 vendvotime.
Pas procesimit të të gjitha vendvotimeve brenda vendit, do të nisë numërimi i votave me kusht dhe atyre nga diaspora – si për subjektet politike, ashtu edhe për kandidatët për deputetë.
Ndarja e ulëseve brenda koalicionit pritet të jetë përfundimisht pesë me tre. Pesë mandate do t’i ketë AAK-ja e Ramush Haradinajt, ndërsa tri Nisma.
Koalicioni AAK-Nisma-Konservatorët-Intelektualët-Ideal, numëron 7 për qind të votave të subjekteve politike në zgjedhjet e 9 shkurtit. Bazuar në këtë numër, koalicioni pritet të ketë tetë deputetë në legjislaturën e ardhshme.
