Një sukses i madh është shënuar për triathlonin dhe sportin e Kosovës.
Sportisti, Albion Ymeri, është kualifikuar për të marrë pjesë në Lojërat Botërore – World Games 2025, që mbahen në Chengdu të Kinës, nga 7 deri më 17 gusht.
Kjo është hera e parë që Kosova do të përfaqësohet ndonjëherë në këtë ngjarje prestigjioze ndërkombëtare, e cila mbledh sportistët më të mirë të disiplinave joolimpike nga e gjithë bota.
Ymeri siguroi pjesëmarrjen falë renditjes së tij të lartë në disiplinën e duathlonit, ku aktualisht gjendet në pozitën e 39-të botërore.
Lojërat Botërore organizohen çdo katër vjet nga Asociacioni Ndërkombëtar i Lojërave Botërore (IWGA) dhe konsiderohen si platforma më e rëndësishme për sportet që nuk janë pjesë e Lojërave Olimpike.
