Ambasadori i Britanisë së Madhe në Kosovë, Jonathan Hargreaves, ka zhvilluar sot një takim me kryetaren e Dhomave të Specializuara të Kosovës, Ekaterina Trendafilova.
Përmes një postimi, Hargreaves bëri të ditur se takimi u mbajt në ambientet e Ambasadës Britanike dhe se gjatë bisedës është ritheksuar mbështetja e Britanisë për pavarësinë dhe funksionimin e kësaj gjykate.
“Me kënaqësi mirëprita sot në Ambasadën Britanike Zonjën Ekaterina Trendafilova, Presidente e Dhomave të Specializuara të Kosovës. Në themelimin e kësaj gjykate në vitin 2016, Kosova tregoi përkushtimin e saj për të përcaktuar të vërtetën dhe për të siguruar drejtësi për të gjitha viktimat,” u shpreh ambasadori.
Ai shtoi se mbështetja e Londrës për sundimin e ligjit në Kosovë mbetet e palëkundur.
“Ashtu siç Britania e Madhe mbështeti Kosovën në vitin 1999, ne vazhdojmë të mbështesim sundimin e ligjit në Kosovë dhe pavarësinë e Dhomave të Specializuara si pjesë integrale e sistemit të saj ligjor. Ne e njohim ndjeshmërinë e mandatit të gjykatës, por aftësia e saj për të komunikuar me popullin e Kosovës nuk duhet të pengohet. E vërteta dhe drejtësia duhet të triumfojnë”, përfundoi Hargreaves.
