Aktivistët e grupit ‘’Asnji cent ma shumë’’ kanë njoftuar se do të vazhdojnë protestat para zyrave të ZRrE, duke filluar nga ora 08:00 nesër në mëngjes.
Lajmi është bërë i ditur përmes një postimi në rrjetin social ‘’Facebook’’, ku ata shprehën qëndrimin e tyre të fortë pas sulmeve të fundit ndaj aktivistëve dhe mbrojtjes që, sipas tyre, shteti po i bën interesave të KEDS-it.
“Pas sulmit brutal ndaj aktivistëve dhe mbrojtjes së hapur që shteti po i bën interesave të KEDS-it, ne nuk do të ndalemi. Asnjë rrahje, asnjë arrestim dhe asnjë presion nuk mund të na ndalë ta kërkojmë të drejtën tonë. Nesër, e enjte, në orën 08:00, do të jemi sërish te zyrat e ZRrE-së për të vazhduar bllokadën,” thuhet në postimin e grupit.
Po ashtu, aktivistët kanë njoftuar se një tjetër protestë do të mbahet të shtunën, më 5 prill, në orën 15:00, për të shprehur kundërshtimin e tyre ndaj shtrenjtimit të çmimit të energjisë elektrike.
