Uragani Milton ka arritur fuqinë maksimale të kategorisë 5, duke u bërë një nga stuhitë më të rrezikshme që ka kërcënuar Floridën në vitet e fundit. Uragani pritet të godasë bregun e Floridës të mërkurën. Me shpejtësi erërash që tashmë kanë arritur 280 km/h ndërsa me vrullshmëri deri në 315 km/h, kjo stuhi përbën një rrezik serioz për jetën e banorëve dhe infrastrukturën e zonave bregdetare.
Kjo forcë erërash është mjaft e madhe për të shkaktuar dëmtime shkatërrimtare në ndërtesa, të shkulë pemë dhe të prishë linjat e energjisë elektrike, duke lënë miliona banorë pa energji për ditë ose javë.
Valët e stuhisë janë një nga rreziqet më të mëdha që përballet Florida. Ekspertët parashikojnë dallgë të larta 3 deri në 6 metra, veçanërisht në zonat rreth Tampa Bay, duke kërcënuar me përmbytje katastrofike të rajoneve bregdetare. Valët e stuhisë, të përziera me reshjet e mëdha të shiut, mund të shkaktojnë përmbytje masive, me reshje që pritet të arrijnë deri në 400 mm në disa zona, gjë që do të rëndojë gjendjen në tokat që tashmë janë të ngopura nga reshjet e mëparshme.
Autoritetet kanë urdhëruar evakuime të detyrueshme për shumë zona, përfshirë Fort Myers Beach, duke i bërë thirrje banorëve të largohen menjëherë. Pritet që ndërprerjet e energjisë elektrike të jenë të gjera për shkak të forcës shkatërruese të erërave, të cilat mund të shkatërrojnë infrastrukturën.
Ndërkohë, rajonet e tjera në jugperëndim të Floridës po përgatiten për përmbytje dhe rrezikun e tornadove të izoluara që mund të shfaqen nga fuqia e Milton. Njëra nga shqetësimet më të mëdha mbetet stuhia e fuqishme dhe ndikimi që do të ketë në jetën e banorëve dhe ekonominë e zonës.
Në këto momente kritike, është e rëndësishme që çdo banor i zonave të prekura të dëgjojë udhëzimet e autoriteteve dhe të evakuohet në mënyrë të sigurt. Të gjithë duhet të përgatiten për më të keqen, pasi Milton përbën një kërcënim serioz dhe të pashmangshëm për jetën dhe pronën.
Mos e nënvlerësoni fuqinë e kësaj stuhie – qëndroni të sigurt dhe ndiqni zhvillimet më të fundit!
