Microsoft ka prezantuar një funksion të ri në motorin e tij të kërkimit Bing – një gjenerator videosh të mundësuar nga inteligjenca artificiale. Ky mjet, i quajtur Bing Video Creator, është i fuqizuar nga modeli më i fundit i OpenAI, Sora, i cili mund të krijojë video të shkurtra duke u bazuar në përshkrime tekstuale.
Sipas Telegrafit, veçoria është tashmë e disponueshme falas për përdoruesit e aplikacionit celular të Bing dhe pritet të zgjerohet së shpejti edhe në versionin desktop dhe në platformën Copilot Search.
Microsoft, i cili ka investuar miliarda dollarë në OpenAI për të avancuar zhvillimet në fushën e AI-së, ka qenë ndër të parët që integroi aftësitë gjeneruese të imazheve nga DALL·E në Bing gjatë vitit 2023.
Prandaj, integrimi i teknologjisë së videove nga Sora është një hap i pritshëm drejt forcimit të pozicionit të tij në garën e inteligjencës artificiale.
Megjithatë, modeli Sora pati një nisje të vështirë. Ai u kritikua nga CEO i YouTube për mënyrën se si ishte trajnuar dhe gjithashtu u përball me reagime të ashpra nga disa pjesëmarrës të fazës së testimit të hershëm.
