I dërguari i Lëvizjes “Vetëvendosje” në RTK, Rilind Gërvalla, ka larguar pesë moderatorë nga ekrani, duke i akuzuar ata për reklamimin e aktiviteteve personale në rrjetet e tyre sociale.
Ky veprim ka shkaktuar reagime të forta, sidomos nga juristja e medias, Flutura Kusari, e cila e ka quajtur këtë vendim një sulm ndaj grave, duke vlerësuar se “Në RTK gratë shtypen“.
Vendimi i fundit i menaxhmentit të RTK-së ka qenë ndalimi i përdorimit të llogarive personale në media sociale nga gratë dhe punëtoret e RTK-së për qëllime marketingu.
Kusari ka thënë se ky veprim ka një ndikim të drejtpërdrejtë në pavarësinë financiare të grave, e cila është arritur me shumë mund dhe sakrifica.
“Ky vendim ka ndikim direkt në pavarësinë financiare të grave, e cila pavarësi po fitohet me shumë mundi.
Pra është sulmi ma i poshtër dhe poshtërues që mundet me iu ba grave”, shkroi ajo.
Kusari ka denoncuar gjithashtu se gratë që refuzojnë të zbatojnë këtë vendim, që ajo e konsideron të paligjshëm dhe shtypës, po largohen nga ekrani dhe po vendosen në pozita të tjera.
“Në vend se menaxhmenti me përdorë fuqinë e tyre me bo presion për rritje të pagave të gazetarëve, ata kqyrin edhe qat pak pavarësi financiare që e kanë mbërri gratë, me ua shkatërru. E tash, hapi tjetër është që gratë që nuk po e zbatojnë këtë vendim shtypës, pa bazë ligjore dhe të poshtër, po i largojnë nga ekrani dhe po i vendosin në pozita tjera. Dy gra janë largu nga ekrani javën e kalume”.
Sipas saj, thellësisht ky vendim po përdoret me i ataku gratë që po e ruajnë pavarësinë e tyre dhe nuk po bëhen vegël propaganduese e pushtetit.
“Në këtë nivel ka ra RTK falë Vetëvendosjes”.
Gërvalla ka ndëshkuar me largim Fëllanza Çitakun, Fitore Rexhepin, Alba Merovcin, Jehona Zhitin dhe Arbër Zekën.
Ky veprim ka ardhur pas një paralajmërimi të dhënë nga Gërvalla në fillim të muajit mars, ku ai u kishte bërë të ditur stafit të RTK-së se nuk kanë të drejtë të bëjnë reklama personale në rrjetet e tyre sociale, pasi duhet të ruhet profesionalizmi i televizionit publik.
“Duke marrë parasysh misionin e transmetuesit publik për të ruajtur profesionalizmin dhe besueshmërinë e programeve tona, ju njoftojmë se është marrë vendim për tu ndaluar reklamimi i produkteve, shërbimeve, ose brendeve në rrjetet tuaja sociale. Ky vendim është marrë në përputhje me politikën tonë të ruajtjes së integritetit dhe besueshmërisë të transmetuesit publik, si dhe për të shmanguar çdo ndërlidhje të mundshme mes interesave të jashtme dhe misionit tonë publik”, thuhej në këtë Email të RTK-së.
Ajo ka përmendur se dy gra u larguan nga ekrani javën e kaluar, duke theksuar se ky vendim po përdoret si një mjet për të sulmuar gratë që mbajnë pavarësinë e tyre dhe nuk duan të bëhen vegla propaganduese të pushtetit.
Në këtë mënyrë, Kusari ka akuzuar RTK-në për rënien në nivelin më të ulët të pavarësisë mediatike, duke theksuar se kjo ka ndodhur nën udhëheqjen e Lëvizjes “Vetëvendosje”.
