Kryeprokurori i Prokurorisë Themelore në Ferizaj, Burim Çerkini, ka shpalosur detaje që çuan drejt vrasjes së rreshterit Muhamed Lika.
Ai është pyetur nëse ka dyshime për vrasje të organizuar apo të paramenduar ndaj rreshterit, dhe Çerkini ka hedhur dyshime se mund të ketë qenë një vrasje e tillë.
“Sipas asaj që shihet, përderisa kanë marrë pjesë dy persona, mund të jetë që kjo vrasje ka qenë e planifikuar,” tha ai.
Kryeprokurori i Ferizajt, Burim Çerkini bëri të ditur se personat e dyshuar për vrasjen e policit nuk kanë qenë të maskuar por kanë pasur vetëm kapele në kokë.
“Nga pamjet duket që kanë qenë persona të rinj, nuk është e mundur të bëhet identifikimi i tyre dhe se nga cili vend janë ata persona. Personat nuk kanë përdor maska, kanë përdor kapela. Duke qene se rasti ka ndodh pas orës 23:00, ka qenë errësirë dhe identifikimi ka qenë më i vështirë”, ka thënë ai para mediave.
