Komisionerja për Zgjerim e BE-së, Marta Kos, në një video-mesazh në ditën e organizatave të shoqërisë civile, tha se është duke punuar për rritjen e mbështetjes financiare të BE-së për OJQ-të në Ballkanin Perëndimor.
Duke folur për rëndësinë e OJQ-ve për demokracinë, Kos tha se javën e kaluar ka pritur një grup të OJQ-ve nga Serbia, të cilët i folën asaj se si situata politike po i ndikon në punën e tyre.
“OJQ-të janë shtylla kurrizore e demokracive të shëndosha. Ato përforcojnë zërat, mbrojnë të drejtat dhe i mbajnë përgjegjës të pushtetshmit. Sepse demokracia nuk është ndërtuar vetëm në parlamente apo gjykata, ajo është ndërtuar në komunitete, në shtëpi dhe në zemrat e të gjithë qytetarëve. Ja pse kam zero tolerancë për veprimet që e minojnë shoqërinë civile dhe pse jam duke punuar në rritjen e mbështetjes financiare të BE-së në Ballkanin Perëndimor”, tha Kos.
Deklarata e saj vjen në kohën kur Administrata Trump pezulloi fondet për pothuajse të gjitha programet e ndihmës ndërkombëtare amerikane të cilat u zbatuan kryesisht përmes Agjencisë Amerikane për Zhvillim Ndërkombëtar, USAID.
Instituti GAP kishte thënë më herët se në Kosovë ky vendim i presidentit amerikan Donald Trump i ndikon rreth 17 projekte aktive të financuara nga USAID që japin kontribut të rëndësishëm në zhvillimin e vendit. Ndër përfituesit e këtyre ndihmave ishin edhe shumë OJQ.
Po ashtu, Kos përmendi OJQ-të nga Serbia pas bastisjes që u bë në zyrat e disa organizatave joqeveritare që bashkëpunuan me USAID-in. Për këtë aksion kishte reaguar menjëherë Bashkimi Europian që tha se ndërhyrjen e pa me shqetësim të madh dhe tha se shoqëria civile duhet të veprojë në mënyrë të lirë dhe pa presion.
