“Për tre vjet, Ukraina ka luftuar me guxim të admirueshëm kundër një agresori – Rusisë”.
Presidenti francez Emmanuel Macron ka mbërritur në Shtëpinë e Bardhë për bisedime me Presidentin e SHBA-ve, Donald Trump në përvjetorin e tretë të pushtimit të plotë të Rusisë në Ukrainë.
Macron tha se po viziton SHBA-të për të “riafirmuar” mbështetjen e tij “të palëkundur” për Ukrainën.
Në një postim në X, Macron thotë: “Për tre vjet, Ukraina ka luftuar me guxim të admirueshëm kundër një agresori – Rusisë”.
“Për sovranitetin dhe lirinë. Mbështetja jonë për Ukrainën do të mbetet e palëkundur”.
“Unë jam në Washington për të riafirmuar këtë dhe për të ecur përpara me Presidentin Donald Trump dhe aleatët tanë”, thotë ai.
Para se të fluturonte për në Washington, Emmanuel Macron u koordinua edhe me kryeministrin britanik Keir Starmer, i cili gjithashtu pritet në Washington të enjten, për mesazhin që do të dërgohet.
Londra dhe Parisi po punojnë për vendosjen e një force evropiane në Ukrainë, pasi të arrihet një marrëveshje paqeje, në mënyrë që të bindin Rusinë që të mos sulmojë përsëri vendin.
“Ideja është që të vendosen ushtarë që janë në vijën e dytë dhe jo në vijën e frontit. Kjo mund të kombinohet me një operacion shumëkombësh, me kontigjente ekstra-evropiane”, tha një burim francez i afërt me diskutimet për AFP-në.
Të dy udhëheqësit pritet t’i kërkojnë presidentit të SHBA-ve në këmbim të ofrojë “garanci të forta sigurie” për forcat e dislokuara.
Administrata Trump ka përjashtuar çdo dislokim të trupave amerikane në terren, por mund të ofrojë mbështetje logjistike, sulme të thella, inteligjencë dhe të angazhohet për t’u kundërpërgjigjur në rast të një sulmi rus, shpresojnë evropianët.
Emmanuel Macron gjithashtu shpreson t’i demonstrojë bashkëbiseduesit të tij se duke iu dorëzuar shumë Rusisë, ai do të inkurajonte kundërshtarin e tij numër një, Kinën, të nxiste avantazhin e saj në Tajvan.
Administrata Trump aktualisht është dakord me Moskën, duke e konsideruar “joreale” që Ukraina mund të rimarrë territoret e pushtuara nga Rusia ose të bashkohet me NATO-n.
