Kryeministri i Kosovës, Albin Kurti, ka udhëtuar sot për në Hanover, Gjermani, ku ka marrë pjesë në panairin më të madh ndërkombëtar të industrisë dhe teknologjisë, “Hannover Messe 2025”.
“Për të dytin vit radhazi, Kosova gjendet në mesin e shteteve pjesëmarrëse në “Hannover Messe 2025″, i cili është panairi më i madh ndërkombëtar i industrisë dhe teknologjisë. Me financim nga Agjensia për Investime dhe Përkrahjen e Ndërmarrjeve në Kosovë, KIESA, në kuadër të Ministrisë së Industrisë, Ndërmarrësisë dhe Tregtisë, Republika e Kosovës ka hapësirën e dedikuar ku bizneset vendore kanë mundësi të promovohen, zgjerojnë aktivitetet në tregjet e huaja dhe rrisin eksportet e produkteve dhe shërbimeve të tyre”.
Postimi i plotë i Kurtit:
Për të dytin vit radhazi, Kosova gjendet në mesin e shteteve pjesëmarrëse në “Hannover Messe 2025”, i cili është panairi më i madh ndërkombëtar i industrisë dhe teknologjisë. Me financim nga Agjensia për Investime dhe Përkrahjen e Ndërmarrjeve në Kosovë, KIESA, në kuadër të Ministrisë së Industrisë, Ndërmarrësisë dhe Tregtisë, Republika e Kosovës ka hapësirën e dedikuar ku bizneset vendore kanë mundësi të promovohen, zgjerojnë aktivitetet në tregjet e huaja dhe rrisin eksportet e produkteve dhe shërbimeve të tyre.
Këtë vit ishin tetë kompanitë nga Kosova pjesëmarrëse në panair: Tenton Sh.P.K, Innovation Academy Sh.P.K, Proton Cable L.L.C, Kolegji Ndërkombëtar për Biznes dhe Teknologji UBT Sh.P.K, Nori Glass Sh.P.K., ITE Sh.P.K, Euro Eco Transformers Sh.P.K dhe Talent Management Services Sh.P.K. Bashkë me ministren Hajdari bashkëbiseduam dhe u njohëm së afërmi me veprimtarinë e tyre duke i uruar ditë të frytshme e produktive në kuadër të panairit.
Krahas bizneseve tona, patëm mundësi që të vizitojmë dhe stendat e pavijonet e kompanive lidere si Bosch Rexroth, Festo, Siemens, Aleph Alpha, SAP, Schneider Electric, të cilat i njoftuam me zhvillimin e progresin e vendit tonë dhe potencialin investues te ne. U takuam me drejtorin ekzekutiv të kompanisë Bosch Rexroth, Steffen Haack dhe përfaqësues të kompanive të tjera dhe u mirëpritëm nga drejtori ekzekutiv i Deutsche Messe, Jochen Köckle, që është dhe organizator i panairit.
Qëndrimi në Hanover vijoi me takimet bilaterale me Kryeministrin e landit të Baden-Württemberg-ut, Winfried Kretschmann dhe deputetin e Bundestagut gjerman nga radhët e Partisë Socialdemokrate, SPD-së, Adis Ahmetovic.
Kosova është e projektuar në trajektoren e duhur kah avancimi i teknologjisë dhe industrisë, duke ofruar kushte të favorshme dhe ambient të përshtatshëm e inovativ për të investuar e bërë biznes, ku sipërmarrësit mund të zhvillojnë dhe rrisin aktivitetin e tyre. Qeveria jonë qëndron në mbështetje të bizneseve, gjersa synim parësor mbetet ngritja e Kosovës në arenën ndërkombëtare dhe vendosja e vendit tonë gjithnjë e më në qendër të skenës globale si hapësirë e inovacionit të qëndrueshëm.
