Kryeministri i Kosovës, Albin Kurti, pas homazheve te varri i Astrit Deharit, ka folur për media për hetimin rreth vdekjes së tij.
Kurti ka thënë se deri më tani katër prokurorë të cilët kanë qenë duke u marrë me rastin janë pensionuar dhe se tashmë hetimet po i vazhdon një prokuror i pestë.
Ai shtoi se si Lëvizje Vetëvendosje dhe si Qeveri janë të gatshëm ta ndihmojnë Prokurorinë me çka munden për zbardhjen e rastit të Astrit Deharit.
“Jemi shumë të interesuar, fort të gatshëm, gjithnjë të vullnetshëm, të ndihmojmë me krejt çka mundemi e dimë, Prokurorinë e shtetit, për të sjell drejtësi për Astrit Deharin e familjen e tij”, ka thënë Kurti.
