Bleona Qereti, ka ndarë një perspektivë ndryshe kur bëhet fjalë për krahasimet me emra të njohur si Dua Lipa, Rita Ora dhe Bebe Rexha.
Gjatë një interviste për revistën ‘Living’, ajo ka theksuar se rrugëtimi i saj artistik ndryshon rrënjësisht nga ai i këngëtareve të tjera shqiptare që kanë arritur sukses ndërkombëtar.
“Dua Lipa dhe Rita Ora i përkasin sistemit amerikan; ato janë, teknikisht, këngëtare britanike apo amerikane me origjinë shqiptare,” tha Bleona, duke vënë në dukje dallimin mes tyre.
Ajo vijoi duke theksuar se nuk gjen arsye për krahasime:
“Unë nuk kam arsye të krahasohem me to, sepse rrugëtimi ynë është tërësisht i ndryshëm. Ato nuk kanë ndenjur në radhë për bukë si të gjithë ne në vitet ’90, nuk kanë pasur një karrierë në Shqipëri dhe më pas të kenë kaluar në skenën ndërkombëtare. Ato janë formuar atje, ndërsa unë jam rritur dhe kam filluar këtu, në Shqipëri.”
