Kryetari i Kuvendit, Glauk Konjufca, ka pritur sot në takim delegacionin e pjesëmarrësve në Kursin e Lartë të Sigurisë dhe Mbrojtjes (KLSM), që udhëhiqej nga drejtori i Kolegjit të Mbrojtjes dhe Sigurisë, gjenerali Ylli Pulaj.
Gjatë takimit, Konjufca theksoi edhe një herë rrezikun që i kanoset Kosovës dhe rajonit nga Serbia, si i vetmi shtet që ka bashkëpunim intensiv politik dhe ushtarak me Rusinë dhe Kinën, gjë që bie ndesh me rrugën evropiane dhe demokratizuese të rajonit.
Ndër të tjera, ai shprehu mirënjohjen e tij për mundësitë që jep zhvillimi i këtij kursi, i cili është më i larti në hierarkinë e arsimit të Forcave të Armatosura të Republikës së Shqipërisë, në edukimin dhe kualifikimin e personelit ushtarak dhe civil, si një kontribut në rritjen e kapaciteteve të brendshme në mbrojtjen dhe sigurinë tonë të përbashkët.
“Njëkohësisht, kryetari Konjufca e cilësoi këtë kurs si pjesë të thellimit të mëtejshëm të bashkëpunimit mes Republikës së Kosovës dhe Republikës së Shqipërisë, por edhe në kuadër të ngritjes së kapaciteteve përgjatë rrugës së Kosovës për anëtarësim në NATO”, thuhet në njoftimin e tyre.
