Kandidatja për deputete nga radhët e PDK-së, Hanife Osmani ka uruar presidentin e ri të Amerikës, Donald Trump. Mirëpo Osmani e ka pasur edhe një thumb indirekt për kryeministrin Albin Kurti.
“Me gjasë fraza e njohur e Trump “You are fired” nga koha e “The Apprentice” mund të rikthehet shpejt në skenë”, ka shkruar Osmani.
“The Apprentice” ishte një program televiziv amerikan që gjykonte aftësitë e biznesit të një grupi konkurrentësh. Ai u shfaq në formate të ndryshme në pesëmbëdhjetë sezone në NBC nga viti 2004 deri në vitin 2017. “The Apprentice” u krijua nga producenti televiziv britanik Mark Burnett dhe bashkëprodhuar me Donald Trumpin, i cili ishte nikoqir i shfaqjes për katërmbëdhjetë sezonet e para.
I njohur si “Intervistë Pune”, programi shfaqte të rinj aspirantë, por të panjohur, të cilët konkurronin për çmimin e shfaqjes, një kontratë fillestare prej 250,000 dollarësh njëvjeçare për të promovuar një nga pronat e Donald Trump.
Episodet përfundonin me fjalinë e njohur të Trumpit në rolin e prezantuesit që eliminonte një konkurrente nga gara, me fjalinë “You’re fired” (Je pushuar!).
“The Apprentice” po ashtu është edhe film që i kushtohet pikërisht Trumpit. Aktori i njohur, Sebastian Stan luan rolin e presidentit të SHBA-së dhe biznesmenit, Donald Trump në moshë të re në këtë film.
Osmani këtë postim e ka shoqëruar me fotografinë e përbashkët të presidentit Trump, me ish-presidentin e Kosovës, Hashim Thaçi.
