“Ajo që është në interesin tonë është normalizimi i marrëdhënieve ndërmjet Kosovës dhe Serbisë, qoftë përmes këtij procesi të dialogut, qoftë përmes ndonjë mekanizmi tjetër”, ka thënë përfaqësuesja e lartë e Komisionit Evropian, Kaja Kallas.
Në një intervistë për REL, Kallas ka folur ndër të tjera për protestat në Serbi, të cilat sipas saj janë pjesë e demokracisë, se protestat tregojnë pikërisht këtë – që demokracia funksionon.
E pyetur për dialogun në kuadër të procesit të Brukselit, ajo tha se në prag të vizitës së saj në Ballkanin Perëndimor, të cilën e ka planifikuar për javën e ardhshme, është planifikuar takimi i parë me përfaqësuesin special të sapo zgjedhur. Në takim do të vlerësohen hapat e ardhshëm, ka thënë ajo.
Kallas ka theksuar se janë të interesuar për normalizimin e marrëdhënieve, përmes dialogut, apo ndonjë mekanizmi tjetër.
Ajo ka thënë se dialogu aktualisht është në ngecje dhe se është e nevojshme të merret parasysh qëllimi përfundimtar – normalizimi i marrëdhënieve, qoftë përmes dialogut apo “ndonjë mjeti tjetër”.
“Duket se dialogu është në ngërç për momentin, sepse të dyja palët vetëm akuzojnë njëra-tjetrën. Mendoj se duhet të kemi parasysh qëllimin përfundimtar – normalizimin e marrëdhënieve, në mënyrë që të dyja palët të mund të përparojnë në rrugën e tyre evropiane. Ndoshta do të jetë përmes dialogut, dhe ndoshta përmes ndonjë mjeti tjetër”, ka thënë ajo.
Ajo gjithashtu ka thënë se është e gatshme të shqyrtojë të gjitha opsionet me përfaqësuesin special në ditët në vijim.
Kujtojmë se më 1 shkurt, diplomatit danez Peter Sorensen ka marrë detyrën prej ish-emisarit për dialogun Kosovë-Serbi, Miroslav Lajçak.
Sorensen ka kryer disa detyra në Ballkanin Perëndimor. Ai ka shërbyer si përfaqësues i posaçëm i BE për BeH dhe ka qenë shefi i zyrës së BE në Sarajevë dhe në Shkup.
Kur është fjala për Kosovën, ai ka punuar si këshilltar në misionin e UNMIK-ut dhe ka qenë i angazhuar edhe në Serbi dhe Kroaci.
Në mesin e marsit, ai vizitoi për herë të parë Prishtinën dhe Beogradin në këtë cilësi, ku u takua me zyrtarë të lartë.
