Një incident i rëndë ka ndodhur në orët e para të mëngjesit të sotëm në Zveçan, ku persona të panjohur kanë hedhur dy granata dore në objektin e Postës së Kosovës. Policia e Kosovës tashmë ka dalë me deklaratë zyrtare.
Sipas informacioneve zyrtare, ngjarja ka ndodhur rreth orës 00:20. Njëra nga granatat ka shpërthyer, duke shkaktuar dëme materiale, por fatmirësisht nuk është raportuar për persona të lënduar.
Njësitë relevante të Policisë së Kosovës kanë dalë menjëherë në vendin e ngjarjes dhe kanë konstatuar se brenda objektit ndodhej edhe një granatë e pashpërthyer.
Pas evakuimit të përkohshëm të banorëve përreth, njësia e specializuar për trajtimin e mjeteve eksplozive ka realizuar shpërthimin e saj në mënyrë të kontrolluar.
“Njësia anti-terror janë duke punuar intensivisht për të zbuluar autorët e këtij shpërthimi. Në lidhje me rastin është njoftuar prokurori i Shtetit, i cili ka udhëzuar që rasti të iniciohet si “Shkaktim i rrezikut të përgjithshëm”.
Policia e Kosovës i dënon ashpër këto veprime të rrezikshme dhe apelon tek qytetarët që të bashkëpunojnë me autoritetet për të ndihmuar në identifikimin e autorëve të këtij shpërthimi.
Çdo informacion që mund të ndihmojë hetimet mund të raportohet në numrat e Policisë apo përmes linjave të besueshme të raportimit.” – njoftoi Policia.
