Arbitri i njohur evropian, Szymon Marciniak, është caktuar për të gjykuar finalen e titullit kampion në Abissnet Superiore mes Vllaznisë dhe Egnatias, njoftoi Federata Shqiptare e Futbollit (FSHF).
Marciniak, i cili ka officiuar ndeshje të rëndësishme ndërkombëtare, përfshirë gjysmëfinalen e kthimit të Ligës së Kampionëve ndërmjet Interit dhe Barcelonës, do të drejtojë këtë sfidë të rëndësishme të futbollit shqiptar.
Në këtë takim, ai do të shoqërohet nga asistentët Bartosz Heinig dhe Marek Arys, ndërsa Enea Jorgji do të jetë arbitri i katërt. Në rolin e VAR-it do të jetë Paweł Malec, ndërsa Kreshnik Barjamaj do të mbajë detyrën e AVAR-it.
Ndeshja, që do të vendosë kampionin e sezonit, do të zhvillohet të hënën, më 12 maj, në stadiumin “Arena Kombëtare” në Tiranë, me fillim nga ora 20:00.
