Referendum për shkëputjen e Republikës Sërpska (RS), heqje të kompetencave të Gjykatës dhe Prokurorisë së Bosnjë dhe Hercegovinës në territorin e këtij entiteti dhe tërheqje nga institucionet shtetërore.
Këto janë opsionet me të cilat kërcënon Millorad Dodik, president i Republikës Sërpska, nëse Gjykata e Bosnjë dhe Hercegovinës e dënon për mosrespektimin e vendimeve të përfaqësuesit të Lartë.
Për këtë Forca e Bashkimit Evropian në Bosnje dhe Hercegovinë (EUFOR) po monitoron vazhdimisht zhvillimet në BeH në koordinim të ngushtë me shërbimet lokale të sigurisë dhe është plotësisht i vetëdijshëm për çështjet e sigurisë.
“EUFOR po monitoron situatën në të gjithë vendin dhe është i gatshëm të veprojë brenda mandatit që i është besuar nga Këshilli i Sigurimit i Kombeve të Bashkuara,” thanë forcat ndërkombëtare kur u pyetën në lidhje me gatishmërinë e tyre për t’iu përgjigjur deklaratave destabilizuese të zyrtarëve të Republika Srpska (RS).
Kur u pyetën nëse forcat e EUFOR-it janë të përgatitura të përgjigjen në rast të një shkeljeje të sigurisë në shkallë më të madhe dhe në rast se forcat policore dhe ushtarake lokale nuk janë në gjendje ta bëjnë këtë, ata deklaruan se “Strukturat e EUFOR-it janë të kalibruar vazhdimisht dhe me kujdes për të përmbushur nevojat në rritje të sigurisë”.
“Për momentin fokusi ynë mbetet në ruajtjen e stabilitetit dhe një mjedisi të sigurt. Nëse vërejmë një përkeqësim të ndjeshëm të rendit publik, apo ndonjë kërcënim për sigurinë e civilëve, ne do të veprojmë në bashkëpunim të ngushtë me autoritetet lokale dhe partnerët tanë ndërkombëtarë, brenda kuadrit të mandatit tonë”, thanë ata.
Vlerësimet e vazhdueshme të mjedisit të sigurisë nuk tregojnë ndonjë shenjë të menjëhershme të përkeqësimit, sipas EUFOR, por pavarësisht kësaj, trupat mbeten plotësisht të përgatitura për t’iu përgjigjur skenarëve të ndryshëm të sigurisë.
EUFOR shpjegon se gatishmëria testohet rregullisht përmes trajnimeve dhe ushtrimeve të vazhdueshme, duke përfshirë stërvitjen e rregullt vjetore “Përgjigje e Shpejtë”, gjatë së cilës trupat demonstrojnë aftësinë e tyre për të mbështetur institucionet e Bosnje dhe Hercegovinës në ruajtjen e një mjedisi të sigurt dhe të qëndrueshëm.
