Presidenti i ri i SHBA-së, Donald Trump, ishte në një veturë me paraardhësin e tij, Joe Biden gjatë rrugës nga Shtëpia e Bardhë për në ndërtesën e Kongresit amerikan, ku dha betimin dhe tani është zbuluar se çfarë kanë biseduar.
Me ta në veturë ishte edhe senatorja nga shteti i Minnesotës, Amy Klobuchar, e cila është kryetare e Komitetit të Përbashkët për organizimin e inaugurimeve të Kongresit amerikan.
Në një prononcim për MSNBC, Klobuchar tha se tema kishte shumë, por edhe se “nëse zbulon të gjitha detajet, më nuk do të ftohet”.
“Ata folën më së shumti për zjarret në Los Angeles dhe Lojërat Olimpike që do të zhvillohen atje. Ne folëm edhe për futbollin amerikan, pasi tani është play-off”, tha Klobuchar.
Ajo shtoi se e gjithë biseda ka qenë shumë “e sjellshme” dhe se shpreson që ata të krijojnë një marrëdhënie pozitive pas një lufte të gjatë politike.
“Mendoj se Biden e meriton dhe mendoj se mund ta vlerësojmë ditën që kaluam me familjen Trump”, shtoi senatorja nga Minnesota, duke theksuar se “interesi i përbashkët pavarësisht dallimeve” është gjëja më e rëndësishme për SHBA-në.
