Aktorja e njohur, Adriana Matoshi, ka konfirmuar se do të jetë zyrtarisht deputete në legjislaturën e ardhshme të Kuvendit të Kosovës.
Pas një fushate të suksesshme me Levizjen Vetëvendosje, ku garoi me numrin 50, ajo ka arritur të sigurojë votat e mjaftueshme për një vend në Kuvend, duke i dhënë asaj mundësinë për të kontribuar në politikën kosovare në një nivel të ri.
Matoshi e ka shpallur këtë lajm të rëndësishëm përmes një statusi në rrjetin social Facebook, ku ka falënderuar gjithë qytetarët e Kosovës, mërgatën dhe të gjithë ata që e mbështetën gjatë fushatës elektorale.
“Ju jam shumë mirënjohëse për të gjithë mikëpritjen e përkrahjen që ma keni dhuruar. Ju jam përjetësisht mirënjohëse që përmes vullnetit tuaj edhe njëherë do të jem pjesë e Kuvendit të Republikës së Kosovës. Bashkë kemi me qenë në vështirësitë, sfidat, telashet, betejat, brengat e dertet e së ardhmes”, shkroi Adriana Matoshi në statusin e saj.
Në mesazhin e saj, ajo gjithashtu theksoi se është e gatshme të përballet me çdo vështirësi dhe sfidë për të kontribuar në punët e mira për atdheun e Kosovës dhe për përmirësimin e jetës së qytetarëve. Me qeverinë Kurti 3 që po bëhet gati, Matoshi shpreh optimizëm për të ardhmen dhe punët e mira që do të pasojnë për vendin.
“Qeveria Kurti 3 po bëhet gati, e bashkë me të edhe punët e mira për atdheun tonë të vuajtur, por të jashtëzakonshëm. Ju dua”, ka përfunduar aktorja e njohur.
Ky status ka sjellë një valë të madhe mbështetjeje dhe urimesh nga ndjekësit e saj, që tashmë presin të shohin aktoren të kalojë në një fazë të re të karrierës së saj, duke përfaqësuar interesat e qytetarëve në Kuvendin e Kosovës.
