Kryetari i Lidhjes Demokratike të Kosovës (LDK), Lumir Abdixhiku, ka treguar për vendimin e partisë që drejton për ta bojkotuar RTK-në prej më shumë se një viti, për shkak që, siç thotë kreu i LDK-së, ishte kuptuar që RTK “ishte kapur nga pushteti”.
Abdixhiku ka pasur kritika për partitë e tjera, duke thënë se nuk kanë vepruar njëjtë dhe thotë se disa mungesën e LDK-së në RTK e kishin parë si “mundësi për marrjen e hapësirës televizive”.
“Sot, pra më 1 gusht, mbushen 1 vit e gjysmë qëkur LDK vendosi të bojkotojë në tërësi televizionin publik RTK. Asnjë intervistë, asnjë bashkëpunim, asnjë deklarim – deri në shkarkimin e militantëve partiakë të vënë në krye të mediumit publik. Një vit e gjysmë më parë ne kishim kuptuar kapjen e plotë të politikave redaktoriale të RTK-së nga pushteti popullist. Kishim kuptuar dhe ndikimet direkte të ‘Grupit të PolitByrosë nga Tirana’ dhe gjithë rreziqet propaganduese që buronin nga një konstrukt i tillë. Fatkeqësisht, në atë kohë dhe që nga ajo kohë, ne mbetëm të vetëm. Bojkoti ynë, përkundër konsideratës për gazetarët me integritet që i gjeje brenda RTK-së aty këtu, mbeti veçse një paralajmërim. Madje, nga shumë akterë politikë u pa si një mundësi e mirë e marrjes së hapësirës së lënë nga ne”, ka shkruar Abdixhiku në Facebook.
Kryetari i LDK-së tutje thotë se tashmë që po shihet hapur që “RTK është kapur dhe që politikat redaktoriale po caktohen nga parapushteti” duke shtuar se paralajmërimi dhe vendimi i LDK-së për bojkot marrin kuptim.
“Disa madje dhe e harruan. Siç tha një komentator gjumi këto ditë, pse nuk reagoi LDK për sulmet e RTK-së?! Ndërsa, ne në bojkot! Tani që u pa hapur se kapja, orkestrimi i propagandës e politikat redaktoriale përcaktohen nga pushteti e parapushteti, paralajmërimi dhe bojkoti ynë marrin edhe më shumë kuptim”, ka vijuar ai.
Sipas Abdixhikut, LDK-ja mbetet partia e vetme në bojkotin ndaj RTK-së, teksa ka ftuar edhe akterët e tjerë publikë që të rreshtohen pas vendimit për bojkot.
