Ish-ushtruesi i detyrës së Sekretarit të Federatës së Futbollit të Kosovës, Taulant Hodaj, ka reaguar ashpër pas heqjes së flamurit të Kosovës në Kongresin e 49-të të UEFA-s, të mbajtur të enjten në Beograd.
Por, përveç kësaj, Hodaj ka bërë publik edhe një detaj tejet të rëndë.
Sipas tij, FFK nuk e kishte lejuar të ankohej në UEFA, për ekzistencën e një federate paralele për ‘Kosovën dhe Metohinë’ brenda statutit të Federatës së Futbollit të Serbisë.
Garat e futbollit serb në Kosovë, paralelisht me ato të FFK-së, i ka udhëhequr terroristi Milan Radoiçiq. Hodaj beson se është koha për një ndryshim thelbësor në mënyrën se si shtëpia e futbollit kosovar e përfaqëson Kosovën në skenën ndërkombëtare.
Postimi:
Duke reflektuar mbi kohën time në Federatën e Futbollit të Kosovës, e ndiej të nevojshme të ndaj disa shqetësime thelbësor rreth zhvillimeve të fundit në Kongresin e UEFA-së në Beograd.
Ashtu siç u pa qartë në Beograd, simbolet dhe respekti për Kosovën u shkelën në mënyrë flagrante, ndërsa mungoj një reagim proaktivë dhe protestë e dinjitetshme nga Federata e Futbollit e Kosovës.
Vërtetë e ligë veprimi i Serbisë, siç është e ligë edhe ekzistenca e një federate paralele për ‘Kosovën dhe Metohinë’ brenda statutit të Federatës së Futbollit të Serbisë, me figura si Radoiçiqi, që kanë drejtuar gara paralele në Kosovë. Kërkesa ime të mëhershme për t’iu ankuar UEFA-s ndaj Serbisë për këtë shkelje flagrante të parimeve të futbollit dhe rregullave të UEFA-së është injoruar nga FFK-ja pa asnjë arsye legjitime.
Për të shmangur përsëritjen e këtyre skenarëve të papranueshëm, është imperativë që FFK-ja vetë të kërkojë në mënyrë aktive nga UEFA dhe organizatorët respektimin e plotë të statutit dhe trajtim të barabartë. Në mungesë të një iniciative të tillë, ne si futboll kosovar dhe si shtet, diskreditohemi dhe gjendemi në pozita të pafavorshme.
Besoj fuqimisht se vetëm me një qasje proaktive, të guximshme dhe të bazuar në parimet e statutit të UEFA-s, mund të sigurojmë respektin e merituar për futbollin dhe shtetin tonë. Është koha për një ndryshim thelbësor në mënyrën se si FFK-ja e përfaqëson Kosovën në skenën ndërkombëtare.
