E keni mësuar në shkollë: pothuajse 60% e trupit tuaj përbëhet nga uji. Përtej kësaj, megjithatë, uji është thelbësor për një sërë procesesh, nga ndërtimi i qelizave deri te rregullimi i temperaturës së trupit tuaj.
Pra, ju e kuptoni se kur nuk merrni sasi të mjaftueshme, trupi mund të dehidratohet, ndërsa një trup i dehidratuar mund të paraqesë një sërë problemesh, herë të lehta, ndonjëherë jashtëzakonisht serioze.
Mos pirja e mjaftueshme e ujit nuk është i vetmi faktor që mund të çojë në dehidrim. Më poshtë do të gjeni edhe katër të tjera për të cilat ndoshta nuk dyshoni.
Orët që flini
Gjumi cilësor është thelbësor për funksionimin e duhur të trupit. Të flesh për disa orë nuk është aq e mirë. Në fakt, një studim zbuloi se pjesëmarrësit e rritur që flinin 6 orë ose më pak në natë ishin në rrezik më të madh të hidratimit të pamjaftueshëm sesa ata që flinin 8 orë. Dietologia Maggie Moon thotë se kjo ka të ngjarë të lidhet me ndërprerjen e prodhimit të vazopresinës, një hormon që kufizon sekretimin e ujit nga veshkat.
Fluturimet ajrore
Nëse jeni adhurues i udhëtimeve që përfshijnë fluturime ajrore, me siguri e keni vënë re se jeni vazhdimisht të etur gjatë tyre. Sipas një studimi të botuar në revistën Nutrients, atmosfera në kabinat e avionëve ka lagështi më të ulët se ajri që thithni normalisht në rrugë, gjë që mund të ndikojë në nivelet e lëngjeve dhe hidratimit. Çfarë mund të bëni në këtë rast? Dietologia Jenna Braddock rekomandon të pini ujë para fluturimit dhe sigurisht të vazhdoni të hidratoni gjatë udhëtimit.
Konsumimi i alkoolit
Si ndihet trupi juaj pas një nate duke pirë? Ndoshta i dehidratuar. Siç thotë Braddock, pirja e alkoolit mund të çojë në dehidrim, veçanërisht nëse nuk e shoqëroni me ushqim ose me një lëng tjetër (pa alkool, sigurisht). Provat sugjerojnë se alkooli mund të shtypë sekretimin e vazopresinës, e cila do të mbante ujin në trup. Kjo rrit sasinë e urinës që prodhoni dhe ju bën të shkoni më shpesh në tualet. Pra, sigurohuni që të pini shumë ujë përpara se të dilni për të pirë dhe gjatë shëtitjes, alternoni pijen tuaj me një gotë ujë.
Marrja e tepërt e sheqerit
Tashmë është vërtetuar se sheqeri dëmton shëndetin tuaj në mënyra të ndryshme. Diçka për të cilën mund të mos jeni në dijeni është se marrja e tepërt mund të çojë në dehidrim. Siç raportohet në një botim në Medical News Today, ky zakon i pashëndetshëm mund t’ju lërë të dehidratuar, ndoshta për shkak të ndërveprimit midis sheqerit dhe ujit në qeliza. Konsumi më i lartë i sheqerit bën që qelizat të transportojnë më shumë ujë, duke rritur kështu urinimin.
