Trajneri i njohur i futbollit, Bylbyl Sokoli, ka bërë një hap të ri në karrierën e tij, duke u angazhuar në politikë. Ai ka arritur të sigurojë një ulëse në Kuvendin e Kosovës pas zgjedhjeve të 9 shkurtit.
Ky vendim i tij ka rezultuar të jetë i suksesshëm, duke u mbështetur nga qytetarët e Kosovës dhe bashkëatdhetarët që jetojnë në diasporë.
Në një mesazh falënderimi drejtuar qytetarëve, Sokoli shprehu mirënjohjen e tij për besimin dhe mbështetjen që ka marrë gjatë fushatës zgjedhore.
Ai theksoi se çdo kontribut i qytetarëve ka qenë i rëndësishëm dhe ka ndihmuar në një moment kyç për të ardhmen e vendit.
“Rezultatet e këtyre zgjedhjeve dëshmuan se Vetëvendosje është dhe do të mbetet forca politike e padiskutueshme, e cila udhëhiqet nga një vizion për zhvillim, dinjitet dhe mirëqenie për të gjithë qytetarët tanë,” tha Sokoli, duke falënderuar veçanërisht kandidatin për Kryeministër, Albin Kurti, dhe lëvizjen Vetëvendosje për mundësinë e dhënë.
Ai gjithashtu theksoi se ky angazhim është një nder dhe privilegj, ndërsa shprehu besimin se ky është vetëm fillimi i një udhëtimi që do të sjellë një të ardhme më të mirë për Kosovën.
“Ky është vetëm fillimi dhe së bashku do ta vazhdojmë këtë udhëtim drejt një të ardhmeje më të mirë për vendin tonë,” shkroi Sokoli.
