Mbylljen e Qendrave për Punë Sociale të drejtuara nga Serbia në komunat veriore të Kosovës e ka kritikuar Ambasada e Shteteve të Bashkuara.
Në një reagim në rrjetin social “X”, Ambasada e SHBA-së është shprehur e shqetësuar, për siç kanë thënë, mbylljen e papritur edhe të pakoordinuar të qendrave të mirëqenies.
“Këto dhe veprime të ngjashme ndikojnë negativisht te mijëra qytetarë të Kosovës dhe rrezikojnë krijimin e pasojave të dëmshme për të ardhmen e Kosovës në Evropë dhe marrëdhëniet tona dypalëshe”, thuhet nga SHBA-ja.
Reagim ka pasur edhe nga Bashkimi Evropian.
Zyrtarë e BE-së kanë thënë se statusi i objekteve të Serbisë në veri të Kosovës, që ofrojnë shërbime sociale, duhet të zgjidhet në dialogun që e lehtëson blloku, duke i bërë thirrje Prishtinës që të mos i mbyllë këto struktura.
Për mbylljen e qendrave serbe për Punë Sociale në veri, ka reaguar edhe misioni i OSBE-së në Kosovë.
Në reagimin e saj, OSBE-ja goxha dakord me veprimet që janë bërë.
“Misioni sheh se mbyllja e Qendrave për Mirëqenie Sociale të drejtuara nga Beogradi do të ndikojë në aksesin në shërbimet kryesore për komunitetet joshumicë. Çdo ndërprerje e kujdesit shëndetësor, arsimit dhe mbështetjes sociale prek në mënyrë disproporcionale grupet e cenueshme sociale”.
Më 8 shkurt, policia pati arrestuar katër zyrtarë të Qendrës për Punë Sociale në Zubin-Potok nën dyshimin për veprën penale: “cenim i përcaktuesve të votuesve”.
Pas kësaj, të premten e kësaj jave, me urdhër të Gjykatës Themelore në Mitrovicë, policia ka bastisur dhe mbyllur zyrat e tri qendrave për punë sociale, të cilat operonin ilegalisht në veri.
Sipas policisë, zyrtarë të këtyre qendrave dyshohet se kanë telefonuar qytetarë dhe nën formën e kërcënimit, i kanë detyruar apo udhëzuar se si të votojnë duke i kushtëzuar ndihmat sociale me votën e tyre në favor të një partie politike e cila ishte në garë për zgjedhjet parlamentare në Kosovë.
