Avokati Arianit Koci ka komentuar reagimet që po bëhen ndaj kryetarit të NISMA-s, Fatmir Limajt, në lidhje me faktin se ky i fundit u shpreh hapur për koalicion me LVV-në.
Ai në një postim në Facebook u shpreh i irrituar me këto ironizime që po bëhen ndaj Limajt, duke theksuar se në vazhdimësi politikanët e kanë shkelë ndershmërinë politike.
Postimi i plotë
Po ironizohet me Fatmirin për lakminë ndaj pushtetit dhe mungesën e sinqeritetit.
Po mirë, çka dreqin po bën ai që nuk e kanë bërë të tjerët?
Rrena, mashtrimi, shmangia nga premtimet dhe tradhtitë politike janë bërë standard.
Për një moment po duket sikur dikush e ka shpikur ndershmërinë në politikën kosovare dhe veç Fatmiri po e shkel.
Pushteti nuk fitohet me punë të ndershme e premtime të mbajtura, por me prapaskena, kalkulime dhe lojalitet që zgjat deri në mbledhjen e radhës. Dhe e di çka është më e keqja, ne votuesit jo vetëm që e kemi lejuar këtë, por shpesh kemi brohoritur për ta.
Pra mos u habisni me Fatmirin, thjesht ai po luan lojën sipas rregullave që vetë i kemi pranuar.
