Sulmuesi Albin Berisha i ka dhënë fund aventurës së tij në futbollin e Rumanisë pas vetëm gjashtë muajve.
Ai është larguar nga Petrolul Ploiesti për të vazhduar karrierën në Gjermani, saktësisht te skuadra e Hansa Rostockut.
Berisha është prezantuar të martën te Rostocku, ekip që garon në kategorinë e tretë të futbollit gjerman.
Detajet e transferimit të Berishës nuk janë bërë të ditura, por te Rostocku presin shumë nga Berisha, të cilin e kanë përshkruar si sulmues me përvoj ndërkombëtare dhe përforcim që presin shumë prej tij.
Po ashtu, edhe Berisha është shprehur tejet i lumtur me transferimin e tij në Gjermani dhe ka premtuar se do të bëjë gjithçka për ta ndihmuar Hansa Rostockun për të arritur synimet.
Berisha te Rostocku do ta bartë fanellën me numrin 9 dhe menjëherë të enjten ka filluar stërvitjet tek ekipi gjerman.
Rostocku sezonin e shkuar përfundoi i parafundit në Bundesligën 2 dhe këtë sezon e ka për synim kthimin në kategorinë e dytë të Gjermanisë.
Berisha 23-vjeçar në shkurt të këtij viti u largua nga Ballkani, ekip me të cilin ka fituar tre tituj kampioni në Kosovë dhe u transferua te Petroluli në Rumani.
Këtë sezon, ai ka shënuar 1 gol në 3 paraqitje kampionale për Petrolulin, ndërsa karrierë në Kosovë ka bërë edhe te Malisheva, Liria e Besa.
Po ashtu, ka qenë edhe pjesë e Laçit e Kukësit, skuadra këto nga Shqipëria.
