Kandidati për deputet nga radhët e PDK-së, gjenerali Rrahman Rama, ka vizituar sot ekipin e futbollit KF Vushtrria, duke shprehur mbështetjen e tij të fuqishme për klubin dhe përpjekjet e tij për t’u rikthyer në majat e futbollit kosovar.
Rama, i cili ka një të kaluar si futbollist, tha se i kupton nga afër nevojat dhe sfidat e sportistëve. Ai premtoi se do të jetë gjithmonë pranë klubit dhe do të angazhohet për krijimin e kushteve më të mira për ta.
“Sot i vizitova futbollistët e KF Vushtrria, të cilët po bëjnë punë të madhe për ta kthyer klubin ku e meriton. Dikur edhe unë jam marrë me futboll, andaj i njoh nga afër nevojat e tyre. Unë do të jem krah i tyre gjithmonë. #Rr7“, shkruan gjenerali.
KF Vushtrria, një nga klubet më të njohura në futbollin kosovar, aktualisht po punon intensivisht për t’u rikthyer në formën e saj më të mirë dhe për të arritur synimet e saj afatgjata. Mbështetja e figurave publike, si gjenerali Rama, konsiderohet një motivim i shtuar për klubin dhe lojtarët e tij.
Kjo vizitë e Ramës shënon një angazhim konkret për sportin dhe të rinjtë, ndërsa ai vazhdon fushatën e tij për zgjedhjet e ardhshme.
