Moska nuk beson në Apokalips. As nënshkrimi nga Putin i dekretit që rishikon doktrinën bërthamore, nuk e ka ndryshuar besimin kolektiv. Bomba është një armë verbale dhe jo e vërtetë. Për t’u përdorur për të trembur Perëndimin. Një bllof i mirë për talk show-t e mbrëmjes propagandistike, të populluara nga aspirantë si Dr. Strangeloves që ëndërrojnë raketa mbi Berlin, Londër, Romë dhe Paris, duke e ditur fare mirë se ato janë thjesht muhabet të destinuara për Rusinë e thellë.
“Do të ketë pasoja“, përsërit zëdhënësi i Kremlinit Dmitry Peskov që nga dita kur u ndez drita jeshile jozyrtare për përdorimin e armëve me rreze të gjatë veprimi në territorin e Federatës. Të hamendësosh se çfarë do të bëjë vërtet Vladimir Putin nuk ka qenë kurrë e lehtë. Por qershorin e kaluar, duke iu përgjigjur pyetjes kanonike se cili do të ishte reagimi nëse Kievit do t’i jepej leja për të goditur territorin rus me armë të furnizuara nga Evropa, presidenti tha se gjëja e parë do të ishte përmirësimi i sistemit të tij të mbrojtjes ajrore.
Më pas ai shtoi: “Nëse dikush mendon të dërgojë armë në një zonë lufte për të na goditur, nuk e kuptoj pse ne nuk mund të bëjmë të njëjtën gjë në ato rajone të botës ku infrastruktura dhe pronat e vendeve mike të Rusisë janë nën sulm”.
Nuk është ende një doktrinë e re, por jemi afër. Vetëm një muaj më parë, aleati i tij “më besnik”, presidenti bjellorus Alexander Lukashenko, konfirmoi ekzistencën e këtij opsioni gjatë një interviste për BBC. “Rebelët Houthi mund të shkojnë në Kremlin dhe të kërkojnë armë për të kryer sulme të tmerrshme ndaj anijeve të huaja“, tha ai me mënyrën e tij të zakonshme të nënkuptimit.
“Dhe çfarë ndodh atëherë nëse Putini i furnizon ata me një sistem raketash, dhe ndoshta ata godasin edhe një avion perëndimor?” Konstantin Sivkov, anëtar i Akademisë së Shkencave të Raketave dhe këshilltar i Kremlinit, konfirmon: “Një zgjidhje shumë e thjeshtë është t’i dorëzojmë armët tona vendeve që kanë marrëdhënie të ndërlikuara me SHBA-në. Ka Hezbollah, ka Huthi. Ne duhet të sillemi në mënyrë strategjike siç janë mësuar të bëjnë amerikanët: të veprojmë me duart e njerëzve të tjerë”.
Hipotezat janë si qershitë, njëra të çon tek tjetra. “SHBA duhet të heqë urgjentisht grupin e saj të aeroplanmbajtësve të Detit të Kuq nga brigjet e Jemenit“, shkruan faqja patriotike ‘Win/Win’. Këto ditë, media ruse është terreni stërvitor për guximin e përgjigjes jo-bërthamore ndaj Perëndimit. Mundësia e lëshimit të një rakete bërthamore në Detin e Veriut “për qëllime demonstruese” është e fortë edhe sepse vërtetohet nga thashethemet e dala nga një nga mbledhjet e fundit të Këshillit të Sigurimit, të raportuara nga disa gazeta.
Faqja ultranacionaliste ‘Tsargrad’ sugjeron hedhjen në erë të infrastrukturës së lidhur me Ukrainën, por edhe të dashur për vendet perëndimore. Bëhet fjalë për tunelin hekurudhor ‘Beskydy’, i cili është pjesë e Korridorit të Pestë Pan-Evropian dhe duke filluar nga rajoni i Lvivit që lidh Ukrainën me Sllovakinë, Hungarinë, Slloveninë dhe Italinë. Nuk mungojnë thirrjet për hakmarrje ndaj Polonisë gjithnjë e më të urryer, që në Rusi janë si majdanozi, shkojnë me gjithçka.
Por çmimin më të lartë do ta paguajnë ata që tashmë kanë vuajtur për më shumë se një mijë ditë. Nuk ka asnjë dyshim për këtë. Kanali opozitar Mozhem Obyasnit pyeti gjysmë milioni abonentët e tij se cili do të jetë reagimi rus. Më shumë se 50 për qind u përgjigjën se Putini do të intensifikojë sulmet e tij ndaj Ukrainës. Parashikim i lehtë. “Rrëzoni rrethin e ndërtesave qeveritare në Kiev, prishni hidrocentralet dhe rezervuarët, shkatërroni të gjitha urat autostrada dhe hekurudhore nëpër Dnieper“.
Receta është dhënë nga koloneli Mikhail Khodarionok, ish-oficer i lartë i stafit të mbrojtjes kundërajrore. Edhe kolumnisti zakonisht i mirëinformuar i Moskovsky Komsomolets, Dmitry Popov beson se e di se cila do të jetë përgjigja përfundimtare e Putinit. “Ukraina bëhet një garnizon i thjeshtë nga i cili Perëndimi kolektiv lufton kundër Rusisë. Një terren parakalimi i pushtuar nga armiku ynë. Që prandaj thjesht duhet të privohet nga kjo hapësirë”.
Për ata që nuk e kanë të qartë konceptin, senatori Andrei Klishas, një mik personal i Putinit, e thjeshton. “Nuk do të ketë asnjë Ukrainë sovrane brenda asnjë kufiri. Nuk do të ketë asnjë shtet ukrainas. Me pak fjalë, nuk do të ketë mbetur asgjë“.
