Rezultati i luftës Ukrainë-Rusi, varet nga një përzierje komplekse e strategjive ushtarake, negociatave diplomatike dhe e qëndrueshmërisë së burimeve të secilës palë. Lufta rrënuese,
ku të dyja vendet synojnë që të shterojnë burimet njerëzore, furnizimet dhe infrastrukturën e njëri-tjetrit, ka të ngjarë që të përcaktojë edhe kohëzgjatjen e këtij konfliktit. Përfundimi i kësaj lufte, do të varet nga sa kohë të dyja vendet mund të vazhdojnë përpjekjet e tyre, si në fushën e betejës ashtu edhe ekonomikisht.
Humbjet ushtarake dhe ato logjistike
Ndërsa lufta vazhdon, që të dyja palët do të përballen me humbje në rritje në burime njerëzore, armatime por edhe rënie të moralit. Harxhimi i burimeve njerëzore dhe pajisjeve ushtarake, do të rëndojë si mbi Rusinë ashtu edhe mbi Ukrainën.
Përdorimi i avionëve, tankeve, artilerisë, dronëve dhe municioneve, tregon se lufta moderne mbështetet shumë tek teknologjia. Që të dyja palët ndërluftuese po përdorin dronë, artileri, tanke dhe forca ajrore. Efektiviteti i përdorimit të këtyre teknologjive, së bashku me humbjet respektive, do të ndikojë shumë në trajektoren që do të ndjekë lufta.
Ndihma me armë për Ukrainën
Ndihma ushtarake e vendeve perëndimore për Ukrainën, mbetet një faktor jetik në rezistencën e saj ndaj pushtimit. Furnizimi i vazhdueshëm me armatime të përparuara teknologjikisht, mund ta forcojë pozicionin e Ukrainës në fushën e betejës. Megjithatë, çdo ndërprerje në këto furnizime, mund të dobësojë ndjeshëm kapacitetin e saj ushtarak.
Marrëveshje mbi fitimet apo humbjet territoriale
Fundi i kësaj lufte, ka të ngjarë të kërkojë një kompromis territorial. Negociatat e gjata dhe të vështira mund të përqëndrohen tek zonat e kontrolluara nga Rusia dhe përpjekjet e Ukrainës për t’i çliruar ato. Zgjidhja do të varet nga ajo nëse të dyja palët do të arrijnë të bien dakord mbi kufijtë ose një statuskuo të re që të kënaq ose të paktën të qetësojë secilën nga palët.
Ndikimi tek vendet fqinje
Pasojat ekonomike dhe politike. Lufta ka shkaktuar tashmë një krizë energjetike në Evropë, flukse të mëdha refugjatësh dhe shqetësime të shtuara në lidhje me sigurinë. Rritja e kostove të energjisë, ndërprerjet në zinxhirët e furnizimit global dhe tensionet gjeopolitike, po i bëjnë më të rënda efektet e përhapjes së luftës në vendet fqinje, veçanërisht në Evropë.
Strategjitë ushtarake dhe masat e sigurisë
Anëtarët lindorë të NATO-s, i kanë rritur ndjeshëm shpenzimet e tyre ushtarake, duke përforcuar qëndrimet e tyre mbrojtëse. Edhe vendet e tyre fqinje janë në gatishmëri të lartë, duke marrë masa parandaluese për të frenuar rrezikun e përhapjes së luftës në territoret e tyre.
Rezultatet e mundshme
Një ngërç ushtarak dhe shkatërrim i zgjatur në kohë. Konflikti mund të vazhdojë edhe për shumë kohë si një luftë rrënuese, ku të dyja palët do të vazhdojnë të konsumojnë kapacitetet ushtarake dhe ekonomike të njëra-tjetrës. Ky skenar mund të çojë në një ngërç të gjatë në kohë, dhe pa një fitues të qartë.
Negociata diplomatike
Një zgjidhje e negociuar, mbetet një rezultat i mundshëm i kësaj lufte, i ndërmjetësuar potencialisht nga aktorët e njohur ndërkombëtarë. Por një skenar i tillë, do të kërkonte kompromise mbi pretendimet territoriale, dhe mund të përfshinte lëshime të rëndësishme nga të dyja palët.
Fitore ushtarake e Ukrainës
Me mbështetjen e qëndrueshme perëndimore, Ukraina mund të rimarrë një territor të rëndësishëm. Megjithatë, ky rezultat do të kërkonte ndihmë të vazhdueshme ndërkombëtare, performancë të fortë ushtarake dhe një dobësim të aftësive luftarake të Rusisë.
Fitore ushtarake e rusëve ose armëpushim
Rusia mund ta konsolidojë kontrollin e saj mbi territoret e pushtuara dhe të pretendojë një fitore taktike. Kjo mund të çojë në një konflikt të ngrirë, të ngjashëm me mosmarrëveshjet e tjera të pazgjidhura që përfshijnë Rusinë, ku armiqësitë ndalojnë, por ku mbeten tensionet themelore.
Presioni i jashtëm dhe sanksionet
Sanksionet e vazhdueshme ndërkombëtare dhe izolimi diplomatik, mund ta shtyjnë Rusinë drejt negociatave. Nëse përkeqësohet ndjeshëm stabiliteti i brendshëm ekonomik ose social i Rusisë, ajo mund të detyrohet të kërkojë përfundimin e konfliktit.
Ndikimi mbi vendet fqinje
Rezultati i luftës do ta rikonfigurojë sigurinë evropiane, veçanërisht për anëtarët e NATO-s. Shpenzimet ushtarake janë rritur ndjeshëm, sidomos në Evropën Lindore, ndërsa arkitektura e sigurisë së rajonit ka të ngjarë të ripërcaktohet në kundërpërgjigje të përfundimit të luftës.
Qëndrimi i Turqisë
Qëndrimi neutral i Turqisë midis Rusisë dhe Ukrainës, e lejon Ankaranë të ruajë fleksibilitetin e saj diplomatik. Kjo mund ta pozicionojë Turqinë si një ndërmjetës kyç në bisedimet e ardhshme të paqes apo rezolutat që do të miratohen pas konfliktit. Duke qëndruar neutrale, Turqia ruan opsionet dhe ndikimin e saj strategjik në rajon.
Lufta Ukrainë-Rusi ka të ngjarë të përfundojë ose përmes një rezultati vendimtar ushtarak ose një kompromisi të negociuar. Një fitore e plotë ushtarake për njërën palë ose tjetrën, duket më pak e mundshme në një periudhë afatshkurtër, duke e bërë më të besueshme një zgjidhje diplomatike apo skenarin e një konflikti të ngrirë.
