Futbollisti i Hajduk Splitit, Leon Dajaku, ka marrë dënim interesant pas reagimit që bëri pasi u zëvendësua në ndeshjen e fundit në kampionatin kroat.
Trajneri i Splitit, Gennaro Gattuso, siç raporton “Index.hr”, ka urdhëruar Dajakun ta paguajë një darkë për të gjithë ekipin për ta shlyer gabimin që bëri.
Dajaku 23-vjeçar u largua nga loja në fundjavë ndaj Slaven Belupos në minutën e 57-të. I inatosur, futbollisti kosovar mori një shihe dhe e hodhi në bankën rezervë. E gjithë skena u kap nga kamerat.
Por trajneri Gattuso ka shpjeguar se nervozizmi i Dajakut nuk ishte me të, por me veten dhe gabimet që bëri gjatë ndeshjes.
Trajneri italian, i njohur për disiplinën strikte, pranoi kërkimfaljen e 23-vjeçarit, por i tha se nuk do të kalojë pa dënim.
Dajaku është kthyer në planet e Hajdukut, pasi fillimisht klubi u përpoq ta shiste.
Hajduku i Splitit, që njihet për përkrahjen shumë të madhe nga tifozët “Torcida”, është lider në kampionatin kroat me 24 pikë. Rijeka dhe Dinamo Zagrebi i kanë nga 20.
