Ministrja e Drejtësisë, Albulena Haxhiu, ka shkuar sot për vizitë në QKUK, ku është duke u trajtuar gruaja e plagosur dje në Fushë-Kosovë, nga bashkëshorti i saj.
Haxhiu është takuar me drejtorin e kësaj klinike, Nazmi Kolgeci, i cili ka bërë të ditur se pacientja është operuar si pasojë e plagëve të marra dhe se ajo po qëndron në këtë klinikë për trajtim.
Sipas Haxhiut i dyshuari sapo është lënë i lirë ka shtënë me armë zjarri mbi gruan e tij. “Edhe ky rast është dëshmia më e tmerrshme e neglizhencës së institucioneve të drejtësisë, në këtë rast gjyqtarit dhe sipas informacioneve që kemi me vendimin e së cilit është pajtuar edhe prokurori”.
“Kjo neglizhencë, këto vendime të gabuara e të nxituara po i stimulojnë rastet jo vetëm të dhunës, por edhe vrasjeve”, ka theksuar ministrja.
Ndër tjerash, Policia e Kosovës ka arrestuar dy persona për plagosjen e gruas, njëri prej të cilëve është burri i saj.
