Presidenti i Serbisë, Aleksandar Vuçiq, duke folur rreth zhvillimeve të fundit të mbylljes së nëntë zyrave të Postës së Serbisë në veri të Kosovës, ka thënë se Kryeministri i Kosovës, Albin Kurti, “dëshiron të shkaktojë konflikt para zgjedhjeve në ShBA”.
“Kurti po provokon sepse i mbaron koha dhe kërkon të shkaktojë konflikte para zgjedhjeve amerikane, jo për të pritur një ndryshim të mundshëm në Shtëpinë e Bardhë, por për të na kthyer kundër NATO-s para kësaj. Është e vështirë për popullin tonë, por nuk është pasojë e politikës sonë, por e dhunës”, tha Vuçiq, duke iu përgjigjur pyetjeve të gazetarëve, siç e citoi “Nova”.
“Ai është nervoz. Është e vështirë për njerëzit tanë në Kosovë, por pozicioni i tyre politik nuk është aq i thjeshtë sa, për shembull, dy vjet apo një vit më parë. Ne duhet të jemi racionalë, seriozë, të vendosur në vendosmërinë tonë për të mbrojtur Kosovën”.
Vuçiq shpreson se “nesër KFOR-i do të reagojë siç duhet dhe do ta mbyllë urën mbi Ibër”; dhe shtoi se “është njoftuar për një kundër-reagim nga ana tjetër e Urës”.
“Shpresoj se nuk do të na vendosin në një pozicion ku do të duhej të reagonim, por ndonjëherë dikush ju vë në një pozicion nga i cili nuk mund të dilni. Besoj se ende nuk jemi në atë pozitë” – tha Vuçiq.
