Ish-diplomati britanik, Ian Bancroft, ka vlerësuar se Kosova dhe Serbia aktualisht janë duke “pritur” zgjedhjet në Shtetet e Bashkuara të Amerikës për të parë se kush do ta marrë drejtimin e Shtëpisë së Bardhë.
“Aktualisht nuk ka asnjë proces dialogu,” tha ai në një intervistë për Balkan Insight.
Nisur nga ky fakt, njohësi i dinamikës në Ballkanin Perëndimor thekson se duhet shpresuar që kjo situatë “të mos e çojë rajonin në një incident të dhunshëm në terren”.
Ish-diplomati britanik ka theksuar gjatë intervistës se masat ndëshkuese të Bashkimit Evropian që u futën në Kosovë “në fakt nuk e patën efektin e dëshiruar”.
Është folur për masa shtesë nëse Kurti vazhdon të shtyjë për hapjen e urës, por ato nuk bëjnë jehonë tek elektorati.
“Ata mund të punojnë në favor të Kurtit, të cilin ai do ta llogarisë para zgjedhjeve në shkurt”, ka shtuar ai.
Nga ana tjetër, Bancroft beson se “nuk ka asnjë nxitje të BE-së” që mund të nxjerrë koncesione nga Serbia.
“Vuçiq është mjaft publik dhe i qartë për atë që mendon për perspektivat e Serbisë për anëtarësim, kështu që pa ata shtytës, ato stimuj, asnjëra palë nuk ka një nxitje për të ecur përpara në dialog.
Ai e karakterizoi situatën aktuale si një situatë të “blerjes së kohës”.
Njerëzit presin të shohin se kush do të fitojë zgjedhjet presidenciale në SHBA, si do të duket ekipi i dialogut në të ardhmen, shtoi ai.
Kur është fjala për Kosovën, zotimi i Serbisë se nuk do ta njohë kurrë pavarësinë do të thotë se kjo çështje mund të përdoret çdo ditë për përfitime politike, beson ai.
“Nëse do të kishte një modus operandi ndërmjet Kosovës dhe Serbisë, sipas të cilit Serbia nuk e njeh zyrtarisht pavarësinë, por e trajton Kosovën si një entitet të veçantë sovran, atëherë ndoshta do të kishit një bazë më të mirë ku nuk do të kishte të njëjtat tundime për t’u armatosur dhe të nxirren këto çështje në plan të parë”, tha Bancroft.
Qëllimi përfundimtar duhet të jetë anëtarësimi në BE për të gjithë rajonin, fshirja e kufijve, mundësimi i lëvizjes së lirë të njerëzve dhe mallrave dhe përmirësimi i ekonomisë. Por, Bancroft tha, “Unë mendoj se shanset janë shumë të vogla.”
